Prokuroria Themelore në Pejë, ka parashtruar kërkesë për caktimin e mases së paraburgimit ndaj Edmond Lajqit, i cili dyshohet për vrasjen e gruas së tij.
Lajmin për Gazetën Insajderi e konfirmoi, Shkodran Nikqi, zëdhënës i Prokurorisë Themelore në Pejë.
“Është parashtruar kërkesa për caktimin e mases së paraburgimit ndaj të pandehurit për vrasje të gruas se tij Seanca pritet të mbahet sonte në Gjykatën Themelore të Pejës”, tha Shkodran Nikçi, zëdhënësi prokurorisë për Insajderin.
Ndryshe Gjykata Themelore në Pejë ka konfirmuar për Gazetën Insajderi se, i dyshuari për vrasjen gruas në Pejë, me 1 shkurt të vitit 2022 është shpallur fajtor për dhunë në familje.
Sipas gjykatës, ai ishte dënuar fillimisht me tre muaj burg, por që pas kërkesës kjo masë i është zëvendësuar me gjobë në shumë prej treqind (300) euro.
“Lidhur me pyetjen e parashtruar nga ana juaj, për të kaluarën kriminale të personit të dyshuar për vrasjen e gruas së tij në Pejë, ju njoftojmë se i njejti me Aktgjykimin e Gjykatës Themelore në Pejë – Departamenti i Përgjithshëm, ttë datës 01.02.2022, është shpall fajtor për vepër penale dhuna në familje nga neni 248 par.1 të KPRK-së, për të cilën vepër I është shqiptuar dënim me gjobë në shumë prej njëqind (100) euro, të cilën gjobë është obliguar që t’a paguaj në afat prej tre (3) muaj pas plotfuqishmërisë së aktgjykimit si dhe dënim me burgim në kohëzgjatje prej tre (3) muaj, I cili dënim me kërkesën e të pandehurit I është zëvendësuar me dënim me gjobë në shumë prej treqind (300) euro, e të cilin dënim është obliguar t’a paguaj jo më vonë se tre (3) muaj pasi aktgjykimi të bëhet i plotfuqishëm. Ndaj aktgjykimit palët nuk kanë ushtruar ankesë, andaj aktgjykimi ka marrë formën e prerë me datë 25.02.2022 dhe i dënuari pas plotfuqishmërisë së aktgjykimit, në tërësi e ka paguar dënimin me gjobë. Me respekt, Gjykata Themelore në Pejë”, thuhet në përgjigjen e Gjykatës dhënë për Insajderin.
Gjyljeta Ukella dyshohet se u privua nga jeta nga bashkëshorti i saj sot rreth orës 08:15, në banesën e tyre në qendër të Pejës.
Rasti u konfirmua nga organet e drejtësisë, të cilët kanë thënë se tashmë është duke u intervistuar i dyshuari, Edmond Lajqi.
